“Egun bat zirkuan” emanaldian zirku bat antzeztuko da, artista izan nahi duen pailazo bat protagonista duena. “Marina, lapurra eta Eskalaren notak” emanaldian, aldiz, irakasle batek bere alaba itsuari kanpai batzuk oparituko dizkio eta musika gorrotatzen duen lapurra liluratzea lortuko dute. “Instrumentuen pasarela” entzunaldian haize eta perkusiozko instrumentuak erakusteko instrumentuen desfile bat antolatuko da, pasarela eta guzti! “Hertzio eta Dezibeliaren maitasun istorioa” kontzertuan, ordea, istorio erromantiko bat biziko da, soinuaren nolakotasunen kontura. Azkenik, “Musikortxea jatetxean” chef bat “Urrezko Kortxea” saria irabazten saiatuko da lankide trakets batzuen laguntzaz.

Lanak dinamikoak izan daitezen ahalegintzen dira irakasleak: erritmoa emanez, ikus-entzunezko bitartekoak erabiliz eta baita baliabide teatralagoak erabiliz ere. Ikusleen parte hartzea ezinbestekoa da eta horretarako edukiak era dibertigarriago eta grafikoago batean lantzen dira. Haurrei hurbilak eta entzun errazak egiten zaizkien obrak erabiltzen dira, telesail zein filmeetatik eratorriak direnak eta baita Eskolako irakasleen konposizio propioko piezak ere.

Kontzertuak eskolako areto nagusian egin ohi dira, ikasturteko ostiral guztietan eta 55 bat minutu irauten dute, “Egun bat zirkuan” entzunaldia salbu, txikienentzat denez 40 minutu irauten du.